ក្ដៅៗ! Clyne ចេញ​ពី​ Liverpool ទៅ​ចូល​រួម​ជាមួយ​ Bournemouth

បើ​តាម​សារព័ត៌មាន Sky Sports ខ្សែ​ការពារ​ស្លាប​ស្ដាំ​ Liverpool កីឡាករ​ Nathaniel Clyne បាន​ចាកចេញ​ទៅ​ក្លឹប​ Bournemouth ក្នុង​លក្ខខណ្ឌ​ខ្ចី​ជើង​រហូត​ដល់​ចប់​រដូវ​កាល ២០១៨/១៩​ នេះ។

កីឡាករ​អង់គ្លេស​រូប​នេះ នៅ​សល់​កុងត្រា​ជាមួយ​ក្លឹប​ Liverpool រហូត​ដល់​ឆ្នាំ ២០២០​ ខណៈ​នៅ​រដូវ​កាល​នេះ រូប​គេ​បាន​បង្ហាញ​ខ្លួន​តែ​ ៤​ដង។​ ចំណែក​ឯ​នៅ​រដូវ​កាល​ ២០១៧/១៨ Clyne ​លេង​បាន​តែ​ ៥​ប្រកួត​ប៉ុណ្ណោះ​ឲ្យ​ក្លឹប​នៅ​ក្របខ័ណ្ឌ​ Premier League។ កត្តា​សំខាន់​មួយ​ដែល​នាំ​កីឡាករ​អង់គ្លេស​លេង​បាន​តិច​ប្រកួត​ គឺ​ដោយ​សារ​តែ​រូប​គេ​បាន​ញាំញី​ដោយ​បញ្ហា​របួស​។

ខ្សែ​ការពារ​ស្លាប​រូប​នេះ ធ្លាប់​បាន​បង្ហាញ​ខ្លួន​ញឹកញាប់​នៅ​ ២​រដូវ​កាល​ដំបូង​របស់​អ្នក​ចាត់ការ​អាល្លឺម៉ង់ Jurgen Klopp ដោយ​នៅ​លីគ​អង់គ្លេស​រូប​គេ បាន​លេង​ ៥២​ប្រកួត​ នៅ​រដូវ​កាល ២០១៥/១៦ និង​ ៤១​ ប្រកួត​នៅ​រដូវ​កាល​បន្ទាប់។

ក្លឹប​ Bournemouth កំពុង​តែ​ឈរ​លេខ ១២​ ក្នុង​តារាង​ Premier League និង​ មាន ២៧​ពិន្ទុ​ក្នុង​ដៃ៕

ប្រភព៖ Sky Sports   ប្រែ​សម្រួល៖ ហ៊ីម រស្មី