Arsenal វាយ​ Newcastle យក​៣​ពិន្ទុ​ និង​រុញ​ Man Utd ទៅ​លេខ​៥​

វិញ​​​ Arsenal បាន​ឡើង​កាន់កាប់​លេខ​៣​ ក្នុង​តារាង​ Premier League ក្រោយ​យក​ឈ្នះ​ Newcastle United ដោយ​លទ្ធផល​២​ទល់​នឹង​០​ ក្នុង​ប្រកួត​សប្ដាហ៍​ទី​៣២។​
៣​ពិន្ទុ​​របស់​ក្រុម​កាំភ្លើង​ធំ​ធ្វើ​បាន​ដោយ​ថ្វី​ជើង​កីឡាករ​រៀប​នឹង​ចាកចេញ​ Ramsey នៅ​នាទី​៣០​ និង​ Lacazette នៅ​នាទី​៨៣។​ ជ័យ​ជម្នះ​នេះ​ធ្វើ​ឲ្យ​ Tottenham Hotspur ដែល​ឈរ​លេខ​៣​ធ្លាក់​ទៅ​លេខ​៤​ខណៈ​ Manchester United ត្រូវ​ខ្ទាត​ទៅ​លេខ​៥​វិញ។

Arsenal នៅ​សល់​១​ប្រកួត​ទៀត​នៅ​ក្នុង​ដៃ​ ពោល​​សម្រាប់​ពួក​គេ​ និង​ក្លឹប​មួយ​ចំនួន​ទៀត​​ទើប​លេង​បាន​៣១​ប្រកួត​ប៉ុណ្ណោះ​ដោយសារ​ជាប់​ប្រកួត​ពាន​ FA Cup កាល​ពី​សប្ដាហ៍​មុន​ៗ។​ ចុង​សប្ដាហ៍​នេះ​នៅ​លីគ​ក្រុម​លោក​ Emery ត្រូវ​ធ្វើ​ដំណើរ​ទៅ​ទឹកដី​ Everton មុន​បើក​ទ្វារ​ផ្ទះ​ស្វាគមន៍​ Napoli នៅ​ Europa League សម្រាប់​សប្ដាហ៍​ក្រោយ​៕