ឃើញ​ឡើង​ជើង​ខ្លាំង Fan បិសាច​ក្រហម​ឲ្យ Mourinho ទិញ Depay មក​វិញ

ខ្សែ​ប្រយុទ្ធ​សញ្ជាតិ​ហូឡង់ Memphis Depay​ កាន់​តែ​​លេង​ល្អ​ទៅ​ៗ ចាប់​តាំង​ពី​ចាកចេញ​ពី​ក្លឹប Manchester United ក្នុង​ឆ្នាំ​២០១៧។

ក្លឹប​បិសាចក្រហម​បាន​​ទិញ​ Dapay ក្នុង​តម្លៃ​២៥​លាន​ផោន​កាលពី​៣​ឆ្នាំ​មុន ប៉ុន្តែ​ដោយ​ឃើញ​ទម្រង់​លេង​មិន​សូវ​ល្អ​ជាមួយ​ក្រុម ក៏​បាន​លក់​ទៅ​កាន់​ក្លឹប​បារាំង Lyon ​ខាត​ជិត​១០​លាន​ផោន។ បច្ចុប្បន្ន​​កីឡាករ​វ័យ​២៤​ឆ្នាំ​កំពុង​ជា​ខ្សែ​ប្រយុទ្ធ​ដ៏​សំខាន់​សម្រាប់ Lyon មាន​ដៃ​គូ​សហការ​កីឡាករ Nabil Fekie។

សម្រាប់​យប់​មិញ​គេ​​បាន​បង្ហាញ​​ទៅ​​ពិភពលោក​​ថា​គេ​អាច​ធ្វើ​រឿង​ពិសេស​បាន​លើ​ឆាក​អន្តរជាតិ។ ក្នុង​ជំនួប​រវាង​ហូឡង់​និង​បារាំង​​នៅ Nations League កាល​ពី​យប់មិញ កីឡាករ​ដែល​គេ​ធ្លាប់​ប្រៀបធៀប​​ទៅនឹង Cristiano Ronaldo រក​បាន​១​គ្រាប់ ជួយ​ក្រុម​ឈ្នះ​ជើងឯក World Cup 2018 លទ្ធផល ២-០។

មើល​ឃើញ​សមត្ថភាព​ល្អ​បែប​នេះ​ហើយ អ្នក​គាំទ្រ​របស់​ក្លឹប Manchester United បាន​ទទូច​ឲ្យ​លោក​ Jose Mourinho នាំ​យកMemphis Depay​ មក​កាន់​ Old Trafford វិញ៕ ​​

ប្រភព៖Sabay News Sport