កីឡាករ Real Betis ៤នាក់ស្ថិតក្នុងបញ្ជីរបស់គ្រូជម្រើសជាតិអេស្ប៉ាញ Enrique

លោក Luis Enrique មិនរួញរាឡើយក្នុងការបង្ហើបឱ្យដឹងថានឹងមានការផ្លាស់ប្ដូរមួយចំនួនក្នុងក្រុមបាល់ទាត់ជម្រើសជាតិអេស្ប៉ាញ ហើយក្នុងនោះមានកីឡាករ៤នាក់របស់ក្លិប Real Betis ត្រូវបានដាក់ចូលក្នុងបញ្ជីព្រាងរួចហើយ។

វិទ្យុ Onda Cero បានផ្សាយជាសាធារណៈថា Pau Lopez, Marc Bartra, Sergio Canales និង Loren Moron បានទទួលលិខិតពីសហព័ន្ធកីឡាបាល់ទាត់អេស្ប៉ាញ ជូនដំណឹងពួកគេថាពួកគេស្ថិតក្នុងបញ្ជីព្រាងសម្រាប់ការប្រកួតមិត្តភាពទល់នឹង អង់គ្លេស និង ក្រូអាត នៅខែកញ្ញា។​ បញ្ជីកីឡាករ ៧០នាក់ត្រូវបានលោក Enrique ធ្វើឡើង ហើយបន្ទាប់ពីធ្វើការជម្រុះមួយចំនួន កីឡាកររបស់ Real Betis ៤នាក់ខាងលើនៅតែជាប់ដដែល ដែលធ្វើឱ្យ Betis មានសង្ឃឹមថាយ៉ាងហោចណាស់ក៏នឹងមានកីឡាករម្នាក់ជាប់ក្នុងបញ្ជី២៣នាក់ចុងក្រោយដែរ។ សមាសភាពកីឡាករក្រុមជម្រើសជាតិអេស្ប៉ាញដំបូងរបស់លោក Enrique នឹងត្រូវបានប្រកាសឱ្យដឹងនៅថ្ងៃទី៣១ខែសីហាឆ្នាំ២០១៨៕