TH
KH
EN
ក្រុមបាល់ទាត់ខេត្តកោះកុង បានបង្ហាញពីការជឿជាក់ ក្នុងការវាយបកយកឈ្នះក្រុមសាលាបាល់ទាត់ជាតិអាយុក្រោម ១៨ ឆ្នាំ (U18 កម្ពុជា) សម្រាប់ការប្រកួតកាត់សេចក្តីជើងទី ២ នៃវគ្គ ១៦ ក្រុមថ្នាក់ជាតិ ពានរង្វាន់សម្តេច ហ៊ុន សែន លើកទី ១២ ឆ្នាំ ២០១៨ នៅថ្ងៃសុក្រនេះ ដើម្បីស្វែងរកឱកាសបានឡើងទៅវគ្គ ៨ ក្រុម។
បើទោះបីជា ក្រុមខេត្តកោះកុង បានចាញ់ក្រុម U18 កម្ពុជា រហូតដល់ ៤-១ ក្នុងការប្រកួតជើងទី ១ នៅមជ្ឈមណ្ឌល និងសាលាបាល់ទាត់ជាតិបាទី ដែលជាកន្លែងហ្វឹកហ្វឺនផ្ទាល់របស់ U18 កម្ពុជា ប៉ុន្តែលោក កៅ សាវា គ្រូបង្វឹកក្រុមខេត្តកោះកុង បានទម្លាក់ការចាញ់នោះ ដោយសារតែក្រុមរបស់លោក មិនបានហ្វឹកហាត់ទាល់តែសោះ។
លោក កៅ សាវា បានប្រាប់ភ្នំពេញ ប៉ុស្តិ៍ កាលពីម្សិលមិញថា៖ «យើងមានសង្ឃឹមក្នុងការវាយបកយកឈ្នះក្រុមសាលាបាល់ទាត់ជាតិអាយុក្រោម ១៨ ឆ្នាំវិញ ព្រោះជើងទី ១ យើងបានទៅប្រកួតនៅលើទឹកដីរបស់គេ ដោយគ្មានបានហាត់អ្វីសោះ ដោយសារភ្លៀង ១០ ថ្ងៃជាប់គ្នា គ្មានកន្លែងហាត់ ប៉ុន្តែការប្រកួតជើងទី ២ នេះ យើងហ្វឹកហាត់ត្រៀមបាន ៤ ទៅ ៥ ថ្ងៃដែរ អ៊ីចឹងការលេងរបស់យើង អាចល្អជាងមុន»។
ជាមួយក្តីសង្ឃឹម ក្នុងការវាយបកយកឈ្នះក្រុម U18 កម្ពុជា សម្រាប់ការជួបគ្នា ជើងទី ២ នៅកីឡដ្ឋានខេត្តកោះកុង នារសៀលថ្ងៃសុក្រនេះ លោក កៅ សាវា ក៏បានត្រៀមកាត់ផ្តាច់ចំណុចគ្រោះថ្នាក់របស់ក្រុម U18 កម្ពុជា ផងដែរ។
គ្រូបង្វឹករូបនេះបានបញ្ជាក់ថា៖ «ក្រុមទាំង ២ នេះ បានជួបគ្នា ៤ ដងទាំងលើកនេះហើយ អ៊ីចឹងយើងបានដឹងពីចំណុចខ្លាំងរបស់គេ គឺក្រុមគេ ភាគច្រើនពេលជួបក្រុមខ្ញុំ គេលេងចេញពីស្លាបទាំងសងខាង រួចលើកចូលតំបន់គ្រោះថ្នាក់តែម្តង ប៉ុន្តែលើកនេះ យើងបានហ្វឹកហាត់ត្រៀមទប់ទល់នឹងចំណុចខ្លាំងរបស់គេរួចហើយ»។
លោកបានបន្ថែម៖ «ក្រុមទាំងមូល មានទំនុកចិត្តខ្ពស់ ព្រោះយើងបានហ្វឹកហាត់ជុំគ្នា ក្រោមការជួយជ្រោមជ្រែងពីបង ផាន់ កាន់ណារ៉ាត ដែលជាប្តីរបស់លោកជំទាវអភិបាលខេត្តកោះកុង គឺគាត់បានសម្រួលទាំងលើការហ្វឹកហាត់ និងថវិកាសព្វបែបយ៉ាង ដែលធ្វើឲ្យក្រុមរបស់យើងមានភាពកក់ក្តៅ ក្នុងការប្រកួតជើងទី ២ នៅលើទឹកដីខ្លួនឯង លើកនេះ»។
បើទោះបីជាលោក កៅ សាវា បានបង្ហាញពីទំនុកចិត្តក្រុមរបស់លោក សម្រាប់ត្រៀមស្វាគមន៍ក្រុម U18 កម្ពុជា លើកនេះ ប៉ុន្តែអ្នកទស្សនាភាគច្រើន នៅតែផ្តល់ទំនុកចិត្តទៅលើក្រុម U18 កម្ពុជា ព្រោះប្រវត្តិជួបគ្នា ២ លើកផ្សេងទៀត ក្នុងការប្រកួតជម្រុះថ្នាក់ខេត្តពានរង្វាន់សម្តេច ហ៊ុន សែន នៅឆ្នាំនេះ គឺ U18 កម្ពុជា បានឈ្នះរហូត។
ចំពោះការហ្វឹកហាត់ ក៏ក្រុម U18 កម្ពុជា ត្រៀមខ្លួនបានល្អជាងក្រុមខេត្តកោះកុង ផងដៃរ ព្រោះពួកគេជាក្រុមយុវជនថ្នាលតំណាងឲ្យកម្ពុជា ដែលមានការបង្វឹកដោយគ្រូបង្វឹកជនជាតិជប៉ុន ក្រោមការទំនុកបម្រុងគ្រប់បែបយ៉ាងពីសហព័ន្ធកីឡាបាល់ទាត់កម្ពុជា ហើយក្រុមនេះ បានហាត់ជុំគ្នា តាំងពីពួកគេមានអាយុក្រោម ១៥ ឆ្នាំឯណោះ។
រវាងក្រុម U18 កម្ពុជា និងក្រុមខេត្តកោះកុង គឺក្រុមណាឈ្នះ ក្នុងការប្រកួតវគ្គ ១៦ ក្រុមនេះ នឹងត្រូវឡើងទៅជួបក្រុមប៉ូលិស នៅវគ្គ ៨ ក្រុម ព្រោះវគ្គនេះបានចាប់ឆ្នោត និងបានកំណត់ពេលវេលាប្រកួតទាំង ២ ជើងរួចរាល់ហើយ ខណៈជើងទី ១ នឹងត្រូវធ្វើនៅថ្ងៃទី ១ ខែសីហា។ ចំពោះលទ្ធផលការចាប់ឆ្នោតក្រុមចំនួន ៦ ទៀតទៀត គឺអង្គរថាយហ្គឺរ ជួបក្រុមភ្នំពេញក្រោន ឯក្រុមម្ចាស់ជើងឯកព្រះខ័នរាជស្វាយរៀង ប៉ះក្រុមក្រសួងការពារជាតិ ស្របពេលក្រុមជើងឯករង ណាហ្គាវើល ត្រូវជួបក្រុមបឹងកេត៕
