ព័រមាន03/08/2018

តើក្រុម U16 កម្ពុជា អាចបន្តយកឈ្នះទីម័រខាងកើត នៅថ្ងៃនេះបានអត់?


ក្រុមបាល់ទាត់ជម្រើសជាតិអាយុក្រោម ១៦ឆ្នាំកម្ពុជា នឹងត្រូវធ្វើការប្រកួតជម្រុះលើកទី៣ ប្រចាំពូល A ក្នុងពានរង្វាន់ AFF U16 Championship 2018 ជាមួយក្រុមទីម័រខាងកើត នៅលើទឹកដីប្រទេសឥណ្ឌូនេស៊ី នារសៀលម៉ោង ៣:៣០ បន្តិចទៀតនេះ។
 

តាមប្រវត្តិជួបគ្នា២លើក ក្នុងពានរង្វាន់ AFF U16 Championship នេះ ក្រុមយុវជនថ្នាល់របស់ទីម័រខាងកើត មិនធ្លាប់ឈ្នះក្រុមយុវជនថ្នាលកម្ពុជា នោះទេ គឺពួកគេបានចាញ់ ៣-០ ក្នុងជំនួបលើកដំបូង នៅកម្ពុជា កាលពីឆ្នាំ២០១៦ ហើយការជួបគ្នាលើកទី២ នៅថៃ កាលពីឆ្នាំ២០១៧ ក្រុមU16កម្ពុជា បានបន្តយកឈ្នះក្រុមទីម័រខាងកើត ១-០។

ដោយឡែក សម្រាប់ការវិលមកជួបគ្នា នៅរសៀលថ្ងៃពុធនេះ គេនៅមិនទាន់ដឹងថា ក្រុមកម្ពុជា អាចបន្តយកឈ្នះក្រុមទីម័រ ជាលើកទី៣ ឬយ៉ាងណានោះទេ? ខណៈការប្រកួតនេះ កម្ពុជា ត្រូវការឈ្នះខ្លាំងបំផុត ដើម្បីបង្កើនភាគរយ ក្នុងការប្រជែងទៅវគ្គបន្ត ព្រោះការចាញ់ក្រុមU16វៀតណាម ១-០ តែបានលត់ក្រុមហ្វីលីពីន ៥-១ បានជួយឲ្យក្រុមកម្ពុជា កំពុងឈរនៅលេខរៀងទី៣ ក្រោមក្រុមម្ចាស់ផ្ទះឥណ្ឌូនេស៊ី និងវៀតណាម ដែលមាន៦ពិន្ទុដូចគ្នា។

យ៉ាងណាក៏ដោយ ការលត់ក្រុមហ្វីលីពីន ៥-១ កាលពីថ្ងៃអង្គារ កន្លងមកនេះ បានធ្វើឲ្យលោក Lee Tae Hoon គ្រូបង្វឹកក្រុមU16កម្ពុជា មានការរំពឹងថា កូនក្រុមរបស់លោក នឹងលេងបានល្អ ដើម្បីស្វែងរកជ័យជម្នះលើក្រុមទីម័រ លើកនេះ ហើយការពឹងនេះ អាចនឹងក្លាយជាការពិត ព្រោះបើធ្វើការប្រៀបធៀបកម្រិតលេងរបស់ក្រុមទាំង២ គឺក្រុមU16ទីម័រ មិនលើសក្រុមU16កម្ពុជា នោះទេ ដោយសារការប្រកួត២លើកកន្លងមកនេះ ក្រុមទីម័រ បានចាញ់ក្រុមម៉ាឡេស៊ី ៣-២ និងបានចាញ់ក្រុមវៀតណាម រហូតដល់ ៤-០៕