ព័រមាន06/08/2018

Newcastle បំពេញការចុះហត្ថលេខាជាមួយខ្សែប្រយុទ្ធអន្តរជាតិជប៉ុន Muto

ក្លិបសារិកាព្រៃ Newcastle United បានចុះហត្ថលេខាជាមួយនឹងខ្សែប្រយុទ្ធអន្តរជាតិជប៉ុន Yoshinori Muto ពីក្លិប Mainz ក្នុងកិច្ចសន្យារយៈពេល ៤ឆ្នាំ។ នេះបើយោងទៅតាមការប្រកាសរបស់ក្លិបស្ថិតក្នុងក្របខ័ណ្ឌ Premier League មួយនេះកាលពីថ្ងៃព្រហស្បតិ៍។ ក្លិប Newcastle បានបញ្ជាក់កាលពីសប្តាហ៍មុនថា ពួកគេបានឈានដល់ការព្រមព្រៀងគ្នាមួយជាមួយនឹងក្លិប Mainz របស់ក្របខ័ណ្ឌ Bundesliga សម្រាប់ការផ្ទេរនេះ។

ការផ្ទេររបស់ Muto ត្រូវបានបំពេញកាលពីថ្ងៃព្រហស្បតិ៍ ក្រោយពីរូបគេត្រូវបានផ្តល់ជូនលិខិតអនុញ្ញាតឲ្យបំពេញការ។ Muto ដែលជាកីឡាករជប៉ុនដំបូងគេក្នុងការចូលរយមជាមួយនឹងក្លិប Newcastle នោះ បានឲ្យដឹងថា៖ «ខ្ញុំពិតជាមានកិត្តិយសណាស់ក្នុងការក្លាយជាកីឡាករម្នាក់សម្រាប់ក្លិបដ៏ធំមួយបែបនេះ»។ បណ្តាញសារព័ត៌មានអង់គ្លេស បានបញ្ជាក់ថា តម្លៃខ្លួននៃការផ្ទេររបស់ Muto មានចំនួនប្រមាណជា ៩,៥លានផោន (ស្មើនឹង១២លានដុល្លារអាមេរិក)។

Muto បានបន្ថែមទៀតថា៖ «ខ្ញុំសង្ឃឹមថា នឹងសម្រេចបាននូវលទ្ធផលល្អ ដែលនោះគឺជាអ្វីដែលខ្ញុំនៅទីនេះដើម្បីធ្វើ។ ខ្ញុំចង់បង្ហាញពីទម្រង់លេងឲ្យបានល្អ និងបន្សល់ទុកឈ្មោះរបស់ខ្ញុំក្នុងប្រវត្តិសាស្ត្ររបស់ក្លិប Newcastle»។ Muto វ័យ២៦ឆ្នាំ គឺជាកីឡាករចំណូលថ្មីទី៤របស់ Newcastle នៅរដូវក្តៅនេះ ក្រោយពីការនាំយកអ្នកចាំទី Martin Dubravka ខ្សែបម្រើ Ki Sung-yueng និងខ្សែការពារ Fabian Schar។ Newcastle នឹងចាប់ផ្តើមយុទ្ធនាការលីករបស់ពួកគេតាមរយៈការធ្វើជាម្ចាស់ផ្ទះទទួលភ្ញៀវ Tottenham Hotspur នាកីឡដ្ឋាន St James’ Park នៅថ្ងៃទី១១ ខែសីហា៕