ព័រមាន16/08/2018

Juventus បដិសេធសំណើដេញថ្លៃខ្សែបម្រើ Mario Pjanic ពីក្រុម Real Madrid

បន្ទាប់ពីអនុញ្ញាតិអោយខ្សែបម្រើ Mateo Kovacic ផ្ទេរទៅចូលរួមជាមួយក្រុមតោខៀវ Chelsea ក្នុងលក្ខ័ណ្ឌខ្ចីជើងនាពេលថ្មីៗនេះ និងមានពាក្យចចាមអារ៉ាមជាច្រើនបានកើតមានឡើងអំពីអនាគតរបស់កីឡាករខ្សែបម្រើ Luka Modric មានការចាប់អារម្មណ៏ចង់បានជាមួយ Inter Milan ផងនោះ។ ក្រុមអធិរាជស Real Madrid ចង់ចុះហត្ថលេខាជាមួយនឹងខ្សែបម្រើកណ្តាលដ៏មានសមត្ថភាពណាម្នាក់មកពង្រឹងក្រុម ហើយម្ចាស់ជើងឯកទ្វីបអឺរ៉ុប ១៣សម័យមួយនេះ បានសម្លឹងឃើញកីឡាករខ្សែបម្រើកណ្តាលរបស់ក្រុម Juventus គឺ Pjanic បន្ទាប់ពីក្លិបបានលក់ Cristiano Ronaldo អោយទៅពួកគេនោះ។

បួនថ្ងៃមុនពេលទីផ្សារអ៊ីតាលីបានបិទទ្វារគេហទំព័រកីឡាករ Tuttosport បានចុះផ្សាយថាៈ ក្លឹបអធិរាជស Real Madrid បានផ្តល់ ៦0លានអឺរ៉ូ ប៉ុន្តែក្រុមស្រ្តីជរា Juventus បានច្រានចោលសំណើសម្រាប់ខ្សែបម្រើសញ្ជាតិបូស្នីរូបនេះ។

Juventus មិនមានឆន្ទៈក្នុងការអនុញ្ញាតិឱ្យកីឡាណាមួយនៃក្រុមរបស់ពួកគេចាកចេញពីក្រុមនៅរដូវកាលនេះ ជាពិសេសជាមួយនឹងការមកដល់របស់កីឡាករ Ronaldo ដែល Pjanic ត្រូវបានក្រុមប្រមើលឃើញថាគឺជាដៃគូដ៏សក្តិសមបំផុត។ កាសែតអ៊ីតាលីមួយនេះក៏បានបញ្ជាក់ផងដែរថាក្លឹប Juventus ចង់បន្តកុងត្រាថ្មីលើកិច្ចសន្យាចាស់របស់ Pjanic ដែលបញ្ចប់ក្នុងឆ្នាំ២០២១ ខាងមុខនេះផងដែរ។