ព័រមាន17/08/2018

Kehrer បំពេញការផ្ទេរទៅកាន់ PSG និងបានចុះកុងត្រារយៈពេល ៥ឆ្នាំ

ខ្សែការពារវ័យក្មេង Thilo Kehrer របស់អាល្លឺម៉ង់ បានបំពេញការផ្ទេររបស់គេទៅកាន់ក្លិប Paris Saint-Germain កាលពីថ្ងៃព្រហស្បតិ៍ ដោយបានចុះហត្ថលេខាលើកុងត្រារយៈពេល៥ឆ្នាំ។ នេះបើយោងទៅតាមការប្រកាសរបស់ក្លិបម្ចាស់ជើងឯករបស់បារាំងមួយនេះ។

ក្លិបអាល្លឺម៉ង់ Schalke បានប្រកាសកាលពីថ្ងៃអាទិត្យថា ពួកគេបានយល់ព្រមលក់កីឡាករវ័យ ២១ឆ្នាំរូបនេះ ទៅឲ្យក្លិប PSG ក្នុងតម្លៃខ្លួន ៣៧លានអឺរ៉ូ (ស្មើនឹង៤២លានដុល្លារអាមេរិក)។ Kehrer គឺជាសមាជិកនៃក្រុមជម្រើសជាតិអាល្លឺម៉ង់ ដែលបានឈ្នះពាន Euro អាយុក្រោម ២១ឆ្នាំ កាលពីខែមុន និងបានលេងការប្រកួតក្របខ័ណ្ឌ Bundesliga ចំនួន២៧លើកសម្រាប់ក្រុម Schalke កាលពីឆ្នាំមុន។ រូបគេនឹងក្លាយជាកីឡាករចំណូលថ្មីទី២របស់ PSG នៅរដូវក្តៅនេះ ក្រោយពីការចូលរួមជាមួយនឹងអ្នកចាំទីជើងចាស់ Gianluigi Buffon សញ្ជាតិអ៊ីតាលី។

រូបគេបានប្រាប់គេហទំព័រក្លិប PSG ថា៖ «វាពិតជារំជួលចិត្តណាស់ និងពោរពេញដោយមហិច្ឆតា ដែលខ្ញុំចូលរួមជាមួយនឹងក្លិប Paris Saint-Germain នៅថ្ងៃនេះ»។ ខ្សែការពាររូបនេះបានបន្ថែមទៀតថា៖ «ទូទាំងអឺរ៉ុប ភាពខ្លាំង និងការទាក់ទាញនៃគម្រោងរបស់ក្រុម PSG ពិតជាមានភាពល្បីល្បាញ។ គ្មានកន្លែងណាផ្សេងដែលខ្ញុំអាចគិតថា មានក្លិបល្អប្រសើរជាងនេះដើម្បីបន្តការអភិវឌ្ឍរបស់ខ្ញុំ និងសម្រេចគោលដៅរបស់ខ្ញុំឡើយ»៕