ព័រមាន18/08/2018

Leicester ចុះហត្ថលេខានំាយកខ្សែការពារវ័យក្មេង Soyuncu ពីក្រុម Freiburg

អ្នកចាត់ការទូទៅក្រុមកញ្ជ្រោងខៀវ Leicester City លោក Claude Puel បានបញ្ជាក់ថា កីឡាករខ្សែការពារ Caglar Soyuncu បានផ្ទេរពីក្រុម Freiburg មកលេងរួមក្រុម Leicester City ជាផ្លូវការណ៏ក្នុងតម្លៃ ១៩លានផោន ប៉ុន្តែមិនទាន់ត្រូវបានក្រុមបញ្ជាក់ពីសុពលភាពនៃកិច្ចសន្យានៅឡើយបន្ទាប់ពីត្រូវបានផ្តល់លិខិតអនុញ្ញាតិការងារ និងត្រួតពិនិត្យសុខភាពរួចរាល់មក។

ក្រុម Leicester បានប្រកាសនៅថ្ងៃផុតកំណត់ទិញដូរកីឡាករថាកិច្ចព្រមព្រៀងមួយត្រូវបានគេធ្វើឡើងជាមួយ ក្រុមនៅលីកកំពូលអាឡឺម៉ង់គឺក្លឹប FC Freiburg សម្រាប់ការផ្ទេរខ្សែការពារទួរគីវ័យ ២២ឆ្នាំរូបនេះ។

មុនពេលការប្រកួតនៅថ្ងៃសៅរ៍នេះជាមួយនឹងក្រុម Wolves លោក Puel អ្នកចាត់ការទូទៅក្រុមសញ្ជាតិបារាំង បានប្រាប់ប្រព័ន្ធផ្សព្វផ្សាយថាៈ គាត់(Soyuncu)គឺជាកីឡាកររបស់ក្រុម Leicester City ហើយយើងសប្បាយរីករាយ និងស្វាគមន៍។ គាត់នឹងមកដល់នៅល្ងាចថ្ងៃ(ថ្ងៃព្រហស្បតិ៍ម្សិលមិញនេះ)។ ប៉ុន្តែ Soyuncu នឹងមិនមានវត្តមានចូលលេងនៅការប្រកួតនាថ្ងៃសៅរ៏នេះទេ ដោយសារបួសបន្តិចបន្តួចគាត់នឹងវិលត្រលប់មកហ្វឹកហាត់វិញជាធម្មតាជាមួយមិត្តរួមក្រុម។