​៥​ក្រុម​​បាត​តារាង​ យ៉ាប់​ខ្លាំង​មិន​ធ្លាប់​មាន​ឡើយ​​​ក្នុង​រយៈ​ពេល​២៧​ឆ្នាំ​នៅ​ Premier League

មនុស្ស​ជា​ច្រើន​យល់​ថា Premier League គឺ​ជា​ក្របខ័ណ្ឌ​បាល់ទាត់​ដែល​មាន​ការប្រកួត​ប្រជែង​បំផុត ដោយសារ​តែ​ពិន្ទុ​រវាង​ក្រុម​ខ្សោយ​ និង​ក្រុម​ខ្លាំង​តែង​ប្រកៀកប្រកិត​គ្នា​ពេញ​​រដូវ​កាល ទើប​ធ្វើ​ឲ្យ​លីគ​នេះ​មាន​ប្រជាប្រិយភាព​បំផុត។

ប៉ុន្តែ​នេះ​ជា​លើក​ទី​១​ហើយ​ក្នុង​រយៈពេល​២៧​ឆ្នាំ​នៅ​ក្នុង​ប្រវត្តិសាស្ត្រ​បាល់ទាត់​នៅ​ក្របខ័ណ្ឌ​កំពូល​អង់គ្លេស​​ពេល​ដែល​៥​ក្រុម​​បាត​តារាង មួយ​ក្នុង​ចំណោម​​ពួកគេ​មាន​ពិន្ទុ​៧ និង ផ្សេង​ទៀត​តិច​ជាង​នេះ​ពី​ការ​ប្រកួត​ចំនួន​១១​លើក។ នេះ​បើ​តាម​ការ​កត់សម្គាល់​របស់​ The Guardian។

ត្បិត​១១​ប្រកួត​មិន​ទាន់​គ្រប់គ្រាន់​នៅ​ឡើយ​ដើម្បី​យក​​មក​វាយតម្លៃ​​ ប៉ុន្តែ​​នេះ​ជា​ស្តង់ដារ​ទាប​បំផុត​មិន​ធ្លាប់​មាន​ក្នុង​រវាង​២៧​ឆ្នាំ​នៅ​ចុងក្រោយ​នៅ Premier League នៅ​ពេល​ដែល Fulham, Cardiff, Huddersfield, Newcastle និង Southampton របូត​បាល់​រហូត​ដល់​១០៨​គ្រាប់ ក្នុង​ចំណោម​បរាជ័យ​សរុប​បូក​បញ្ចូល​គ្នា​របស់​ពួកគេ​មាន​ចំនួន ៣៦ ប្រកួត។

ឆ្លង​កាត់​១១​ប្រកួត ​បើ​យក​ក្រុម​បាត​តារាង​ទាំង​៥​បូក​បញ្ចូល​ទើប​តែ​មាន​ ២៩ ពិន្ទុ​ស្មើ​នឹង​ក្រុម​កំពូល​តារាង Man City ប៉ុណ្ណោះ។

ម្យ៉ាង​ទៀត នេះ​ជា​លើក​ទី​១​ហើយ​នៅ​ក្នុង​ក្របខ័ណ្ឌ Premier League ដែល​ក្រុម​៣​គឺ Manchester City, Chelsea និង Liverpool នៅ​តែ​មិន​ដែល​ស្គាល់​ពាក្យ​ចាញ់​សោះ​​បន្ទាប់​ពី​ឆ្លងកាត់​១១​ប្រកូត។ មិន​ដែល​មាន​ឡើយ​ស្ថិតិ​បែប​នេះ​ពី​មុន​មក​​ក្នុង​ដំណាក់​កាល​បែប​នេះ។ ប្រភព​ខាង​លើ​បន្ថែម។

នៅ​ពេល​ដែល​ក្រុម​កំពូល​តារាង​កាន់​តែ​ខ្លាំង ខណៈ​ដែល​ក្រុម​បាត​តារាង​កាន់​តែ​ពិបាក​រក​ពិន្ទុ នេះ​ក៏​ជា​មូលហេតុ​ដែល​ធ្វើ​ឲ្យ​ក្របខ័ណ្ឌ​បាល់ទាត់​​ប្រកួត​ប្រជែង​មួយ​នេះ​​កាន់​តែ​ស្រដៀង​គ្នា​ទៅ​នឹង La Liga របស់​អេស្ប៉ាញ Serie A របស់​អ៊ីតាលី ឬ Bundesliga របស់​អាឡឺម៉ង់៕

ប្រភព៖ theguardian   ប្រែ​សម្រួល៖ សុខ លាងហ៊ត