Ramos ថាអ្នកចង់ឲ្យ Mourinho ទៅ Real វិញគឺខ្វះការគោរព

Sergio Ramos ចាត់ទុកថាការនិយាយរឿង Jose Mourinho អាចទៅដឹកនាំ Real Madrid ឬក៏អត់គឺជាការខ្វះការគោរពចំពោះអ្នកចាត់ការរបស់ពួកគេនាពេលបច្ចុប្បន្ន។

ការនិយាយបែបនេះរបស់ប្រធានក្រុមសញ្ជាតិអេស្ប៉ាញស្របពេលដែល Real Madrid កំពុងត្រៀមលក្ខណ:លេងវគ្គផ្ដាច់ព្រ័ត្រ Club World Cup ជាមួយក្លឹប Al Ain។ Santiago Solari នឹងឈ្នះពានលើកដំបូងបើអាចនាំ Real ឈ្នះការប្រកួតនៅថ្ងៃសៅរ៍នេះបាន។

យ៉ាងណាក្រោយ Mourinho ត្រូវ Manchester United បណ្ដេញចេញមានការលើកឡើងពីលទ្ធភាពដែលបុរសជនជាតិព័រទុយហ្គាល់វិលត្រឡប់ទៅទឹកដី Santiago Bernabeu វិញ។ Ramos បានហៅចចាមអារ៉ាមទាំងនោះថាជាភាសាខ្វះការគោរព។

“អ្នករាល់គ្នាគួរបង្ហាញការគោរពដល់គ្រូបង្វឹកដែលពួកយើងកំពុងមានបច្ចុប្បន្នប្រសើរជាង។ Mourinho បានចាកចេញពី Real ៥ឆ្នាំទៅហើយហេតុអ្វីដែលនៅតែនិយាយពីគាត់ទៀត”។ ខ្សែការពារវ័យ៣៣ឆ្នាំនិយាយដូច្នេះ៕

ប្រភព៖ Sky Sports   ប្រែ​សម្រួល៖ វីរ័ត្ន